قصــه وقصيـده ( لو عندنا من غيب الايام رسه .=.الآدمي مـصـلـوح نـفـسـه يدلـه )

السلام عليكم



اقدم لكم هذه القصه والقصيده



وهي تنسب لــ محمد بن مهلهل الشعلان



كان على محمد بن مهلهل الشعلان دم بسبب قتله لأحد ابناء عشيرته .. فجلا عن قومه ( أي رحل عن قومه بعيدا ً )
مده طويله من الزمن عند احدى القبائل المجاورة , ثم أن اهل القتيل سامحوه
ورضوا بالديه .. فعاد فرحا ً مشتاقا ً الى أهله بعد طول غياب ....


ويوم وصل لمشارف قبيلته شاف ظول
( الظول او الظلاله هم الجماعه من الناس ) عند مارد الما .
ويسمع اصواتهم عالية فتوجه لهم ..... يبي يشوف وش عندهم بدافع الفضول ؟


ويوم قرب لقى ناس متهاوشين ..!!
وهم يجونه اثنين منهم يركضون واحد يطرد الثاني؟


ويوم وصله الاول قاله : بوجهك تراني بوجهك يارجل!؟
وهو يصير ورى ابن مهلهل ويحتمي به؟
وجا الثاني معه سيف يبي يذبحه ..؟


قاله ابن مهلهل : دخيلي يارجل ... عين خير دخيلي؟
لكن هذاك جاي ذبــّــاح؟ وماطاع يبي يضرب دخيله من وراه!؟
وهو يسل ابن مهلهل سيفه وهو يقتله ..دفاعا ً عن دخيله..؟!
وهو يرجع مع اثره...!!
جلا عن ربعه وتغرب مره ثانيه!؟


وقال هالقصيده الجميلة اللي اخذت اصداء واسعه في وقتها الى الآن :






يـامـل قـلــب ٍ كـــل هـــم ٍ يـمـسـه
مــســـة حـــبـــال مـــهـــاوزات الأظـــلـــه
ولـــي عـجــوزٍ كـــل حــيــن ٍ تـعـســه
حــتــى سـفـيــه الــعــرب جــايــز ٍ لــــه
طس السبيل من اشقر التتن طسّه
الـشــاوري يـجـلـي عـــن الـقـلـب عـلــه
مـــن كـيــس قــــرمٍ دايــــم ٍ مـايـدســه
تلـقـاه مـقــروط ٍ عـلــى جـــال دلـــه
لاشفـت ظـول النـاس بـالـك تعـسـه
لاجــنــبــك شــــــر الـمـخـالـيــق خـــلــــه؟
لــو عنـدنـا مـــن غـيــب الايـــام رســـه
الآدمـــــــي مــصــلـــوح نــفــســـه يــــدلــــه
يالله يـالــلــي كــــــل صــــــوتٍ تــحــســه
عـقـد البـلـش غـيـر انـــت مـحــدٍ يـحـلـه
تـــفـــرج لـــمــــن مــثــلـــي زمـــانــــه يـــرســــه
عــلــيــه مــــــن بـــعـــض الـمــعــانــي مــمــلـــه
عـلــيــه مـــــن بــعـــض الـمـعـانــي مـحــســه
ساعـة خـرج مـن علـة ٍ جــاه عـلـه
الــبــوم يــفــرس والـفـهــد صــــار بــســه
تــبـــدلـــت دنــــيــــاك يــافـــطـــن ٍ لــــــــه
سـبـع الـخـلا كـيـف الضـوايـن تنـسـه
والصلح من راع الغنم ماحصـل لـه
الــقــبـــس يـــــــورد والــظــوامـــي تــلــســـه
والــمــزن عـطــشــان والــوطـــى مـايـبـلــه
لاصار عن حقك سلاحك تدسه
ماينـقـعـد لـــك فــــي حــضــون الـمـذلــه